ბევრი მშობლისთვის ერთ-ერთი შეკითხვა სწორედ ეს არის: „ნეტავ, ჩემი ბავშვი საკმარის რძეს იღებს?“ განსაკუთრებით მაშინ, როდესაც ძუძუთი კვებავ, რთულია ზუსტად იცოდე, რამდენი მილილიტრი მიიღო პატარამ. საბედნიეროდ, ბავშვის ორგანიზმი თავად გვაძლევს რამდენიმე მნიშვნელოვან მინიშნებას.
უმეტეს შემთხვევაში, ახალშობილი საკმარის რძეს იღებს, თუ:
- აქტიურად წოვს ძუძუს ან ბოთლს;
- კვების შემდეგ მშვიდდება და კმაყოფილი ჩანს;
- დღეში აქვს საკმარისი რაოდენობის სველი და დასვრილი საფენი;
- ასაკის შესაბამისად იმატებს წონაში;
- როცა ღვიძავს ფხიზელი და აქტიურია.
სიცოცხლის პირველი კვირის შემდეგ, ჩვეულებრივ, ბავშვს დღეში აქვს მინიმუმ 6 კარგად დასველებული საფენი. სველი საფენები ხშირად უფრო კარგი მაჩვენებელია, ვიდრე მხოლოდ კვების ხანგრძლივობა.
✅ რა არის ნორმალური?
თუ ბავშვი ხშირად ითხოვს ძუძუს/ბოთლს, აუცილებლად არ ნიშნავს, რომ მშიერია. ახალშობილები საკვებს მხოლოდ შიმშილის გამო არ ითხოვენ. მათ შეიძლება უნდოდეთ:
- დამშვიდება;
- დედასთან სიახლოვე;
- ჩაძინება;
- უსაფრთხოების შეგრძნება.
განსაკუთრებით სიცოცხლის პირველ კვირებსა და თვეებში ხშირი კვება სრულიად ნორმალურია.
თუ ძუძუთი კვებავ:
- კვებე შენი პატარა მოთხოვნის მიხედვით და არა მკაცრი გრაფიკით;
- მიაქციე ყურადღება, სწორად არის თუ არა ბავშვი მოჭიდებული ძუძუს;
- კვებისას მოუსმინე, ისმის თუ არა ყლაპვის ხმა;
- არ იჩქარო ძუძუს გამოცვლა - მიეცით ბავშვს საშუალება, სრულად დაცალოს ერთი ძუძუ.
დისკომფორტის შემთხვევაში, აუცილებლად მიმართეთ პედიატრს ან ლაქტაციის კონსულტანტს.
ბავშვის კვება მხოლოდ მიღებული რძის რაოდენობით არ ფასდება. თუ ის მშვიდად იკვებება, რეგულარულად ასველებს საფენებს, ასაკის შესაბამისად იმატებს წონაში და კარგად ვითარდება, ეს საუკეთესო ნიშანია, რომ საკმარის კვებას იღებს. თუ ოდესმე ეჭვი შეგეპარებათ, გახსოვდეს -ასეთი კითხვები თითქმის ყველა მშობელს უჩნდება. პედიატრთან დროული კონსულტაცია ყველაზე უსაფრთხო გზაა სიმშვიდის მოსაპოვებლად.
